समाचार
स्वयम्भुनाथ स्कुलले भव्यताका साथ मनायो आफ्नो १९ औँ वार्षिक उत्सव
अक्षर साथी | २०८१ चैत्र १२ गते १०:५१ मा प्रकाशित
अक्षर साथी
लम्की/चैत्र १३
कैलालीको लम्कीचुहा नगरपालिका–२, बघौरामा रहेको श्री स्वयम्भुनाथ बाल विद्या मन्दिर स्कुलले आफ्नो १९ औँ वार्षिक उत्सव भव्यताका साथ मनाएको छ । मंगलबार लम्कीचुहा नगरपालिकाकी नगर उपप्रमुख जुना चौधरी लगायतका अतिथि, अभिभावकको सहभागितामा विद्यालयले आफ्नो स्थापनाको १९ औँ वार्षिक उत्सव भव्यताका साथ मनाएको हो ।
कार्यक्रममा आफ्नो भनाइ राख्दै लम्कीचुहा नगरपालिकाकी नगर उपप्रमुख तथा कार्यक्रमकी प्रमुख अतिथि जुना चौधरीले स्वयम्भुनाथ विद्यालयसँग आफ्नो पुरानो नाता भएकाले आफ्ना लागि यो विशेष रहेको बताइन् । त्यस्तै उपप्रमुख चौधरीले पालिकाबाट गर्न सकिने सहयोग गर्न आफू तयार रहेको बताइन् ।
‘यो विद्यालयसँग मेरो नाता छ। यसको स्थापनाकालदेखि यो विद्यालयसँग नाता जोडिएको हो। औपचारिक कार्यक्रममा मेरो बसाइ प्रायः छोटो हुने गर्छ । तर, आज म यहाँ धनगढीको कार्यक्रमलाई छोटाएर यो वार्षिक उत्सव कार्यक्रमको अन्तिमसम्म बसेर तपाईंहरूका कुरा सुनिरहेकी छु । मेरा लागि यो विशेष छ,’ उपप्रमुख चौधरीले भनिन्, ‘कार्य क्षेत्रमा भएको सीमितता कारण धेरै केही गर्न नसकिएला तर, मेरोतर्फबाट गर्न सकिने सहयोग यो विद्यालयलाई गर्छु ।’
कार्यक्रमका सभाध्यक्ष तथा विद्यालय व्यवस्थापन समितिका अध्यक्ष गणेश राज ओलीले स्वयम्भुनाथ विद्यालय नयाँ तरिकाले अघि बढ्ने बताउँदै वार्षिक उत्सव सफल बनाउन सहभागी भएका अतिथिलाई धन्यवाद व्यक्त गरेका थिए ।
‘विद्यालय स्थापनाकालदेखि अभिभावकज्यूहरूले यस विद्यालयलाई निरन्तर सहयोग गरिरहनु भएको छ । संस्था गाह्रोमा परेको समयमा पनि साथ दिनुभएको छ । यसका लागि अभिभावकज्यूहरूमा आभार प्रकट गर्दछु । त्यस्तै थप गुणस्तरीय शिक्षा दिने र विद्यार्थीको सर्वाङ्गीण विकास गर्नका लागि हामी नयाँ तरिकाले जाने योजनामा छौं । अभिभावकज्यूहरूले यसमा पनि सहयोग गर्ने अपेक्षा मैले लिएको छु,’ अध्यक्ष ओलीले भने, ‘आज हाम्रो १९ औँ वार्षिक उत्सव हो। स्थापनाकालदेखि संघर्ष गर्दै आज हामी यहाँसम्म आइपुगेका छौं । कार्यक्रम भव्य बनाउन आइदिनु भएकोमा धन्यवाद व्यक्त गर्दछु ।’
कार्यक्रममा लम्कीचुहा वडा नं. २ का अध्यक्ष सन्तोष कुमार ओली, कार्यपालिका सदस्य उजीरसिंह सुनार, लम्की प्याब्सनका अध्यक्ष रज बहादुर थापा, शिक्षक रण बहादुर भण्डारी, विद्यालय व्यवस्थापनका घनश्याम डाँगी लगायतको सहभागिता रहेको थियो ।
सोही कार्यक्रममा आन्तरिक खेलकुद प्रतियोगितामा विजेता विद्यार्थीलाई पुरस्कार वितरण गरिएको थियो । त्यस्तै विद्यार्थीले आफ्नो प्रतिभा समेत प्रस्तुत गरेका थिए ।