प्रशासक | २०८२ पौस २ गते ०९:२६ मा प्रकाशित

अक्षर साथी
लम्की, पुस २
  कैलालीको लम्कीमा स्थित लम्की जेसीजले प्रत्येक वर्ष जिल्लाकै ठूलो धनराशि पुरस्कार रहेको क्रिकेट प्रतियोगिता आयोजना गर्दै आएको छ । विद्यालयहरूबीच प्रतिस्पर्धा हुने लम्की जेसिज क्रिकेट कपमा जिल्लाभर क्रिकेटप्रति चासो राख्ने विद्यालयहरूको सहभागिता रहने गर्दछ । प्रायः संस्थागत विद्यालयको वर्चस्व रहने यस प्रतियोगितामा सामुदायिक विद्यालयको सहभागिता न्यून रहँदै आएको छ । यसको मुख्य कारण सामुदायिक विद्यालयमा खेल क्षेत्रका लागि हुने कम लगानी हो ।
  लम्की जेसिज क्रिकेट कपको आयोजना सन् २०२१ बाट सुरु भएको हो । लम्की जेसीजका तत्कालीन अध्यक्ष घनश्याम डाँगीको कार्यकालमा सुरु भएको पहिलो संस्करणमा जम्मा १६ विद्यालय सहभागी थिए, जसमा एक मात्र सामुदायिक विद्यालय र बाँकी सबै संस्थागत विद्यालय थिए । पहिलो संस्करणमा सहभागी एकमात्र सामुदायिक विद्यालय श्री राष्ट्रिय माध्यमिक विद्यालय, लम्कीचुहा–३, बल्चौर व्यवस्थितनगरले यसपटक ऐतिहासिक सफलता हासिल गरेको छ ।
  १९ दिनसम्म सञ्चालन भएको पानसदीप लम्की जेसिज क्रिकेट कप–२०८२ को उपाधि जित्दै श्री राष्ट्रिय माध्यमिक विद्यालयले संस्थागत विद्यालयको दबदबा तोड्न सफल भएको हो । यस जितसँगै लम्की जेसिज क्रिकेट कपमा पहिलोपटक सामुदायिक विद्यालय च्याम्पियन बनेर नयाँ इतिहास रचिएको छ ।
  च्याम्पियन विद्यालयका अध्यक्ष रामबहादुर विष्टले खेलाडीहरूको लगनशीलता, अनुशासन र निरन्तर मेहनतका कारण यो सफलता सम्भव भएको बताए। साथै, उनले उपाधि जितले विद्यालय व्यवस्थापनलाई खेलकुद क्षेत्रमा थप लगानी गर्न प्रेरणा मिलेको उल्लेख गर्दै प्रतियोगिताका आयोजक लम्की जेसीजप्रति धन्यवाद व्यक्त गरे । 
  सिमित स्रोतसाधनका आधारमा पनि सामुदायिक विद्यालय श्री राष्ट्रिय माध्यामिक विद्यालयले उपाधी उचाल्नुलाई अर्थपूर्ण तरिकाले हेरिएको छ ।