प्रशासक | २०८२ चैत्र १७ गते १४:५७ मा प्रकाशित

अक्षर साथी
लम्की, चैत १७
  नेपाल राष्ट्रिय इसाई समाज, लम्कीचुहा नगर इकाईले ‘गुड फ्राइडे’ को अवसरमा विशेष धार्मिक कार्यक्रम आयोजना गर्ने भएको छ । इसाई समाजका अनुसार लम्कीचुहा–२ गणेशपुरमा चैत २० गते एक दिने विषेश ख्रिष्टियन सांस्कृतिक कार्यक्रम सञ्चालन गरिने भएको हो । 

 मंगलबार आयोजित पत्रकार सम्मेलनमा  आफ्नो भनाइ राख्दै “क्षमा र करुणाले युक्त हुने हाम्रो सामाजिक सन्देश” भन्ने मूल नाराका साथ कार्यक्रम आयोजना गर्न लागिएको इसाई समाज, लम्कीचुहा नगरका अध्यक्ष पाष्टर चेतराज जोशले जानकारी दिए । 
  त्यस्तै पाष्टर जन्मजय भट्टराईले सो दिन केवल एउटा धार्मिक अवसर मात्र नभई, प्रभु येशु ख्रिष्टले सम्पूर्ण मानवजातीको लागि देखाउनुभएको निस्वार्थ प्रेम, क्षमा, दया र बलिदानीको जीवन्त सम्झानाको दिन भएको बताए । 
  समाजका अनुसार कार्यक्रममार्फत मानव जीवनमा क्षमा, करुणा र सहिष्णुताको सन्देश फैलाउने उद्देश्य राखिएको छ । साथै, कार्यक्रममा पवित्र धर्मग्रन्थ पाठ, प्रार्थना तथा स्तुति–आराधना गरिने जनाइएको छ ।
त्यस्तै सोही दिनको कार्यक्रममा राष्ट्रिय स्तरका कलाकारको पनि प्रस्तुत रहने छ । देउडा गायक इब्सल संज्ञ्याल, गायक रबि शर्मा र गायक श्याम शाहुको प्रस्तुती हुने आयोजकले जनाएको छ । 
साथै, कार्यक्रममा सहभागी हुन सम्पूर्ण नगरवासी, विभिन्न धर्म तथा समुदायका व्यक्तिहरूलाई आह्वान समेत गरिएको छ ।