अक्षर साथी | २०८१ माघ २९ गते १५:०० मा प्रकाशित

पोष्ट संवाददाता
लम्की/माघ, २९ गतेः
  कैलालीको लम्कीचुहा नगरपालिकामा रहेको श्री चुलिमालिका साहित्यिक युवा क्लबले आगलागीबाट पीडित भएकालाई आर्थिक सहयोग गरेको छ। यही माघ २५ गते घर नजिकको गोठमा आगलागी हुँदा लम्कीचुहा–२, बघनियाकी तुलसी जैसीको गोठ सहित गोठमा राखेका पराल लगायतका सामग्री जलेर नष्ट भएका थिए। उनै तुलसी जैसीलाई क्लबले सम्झन नगद सहयोग गरेको हो।
चुलिमालिका साहित्यिक युवा क्लबका अध्यक्ष सहितको पदाधिकारीले पीडित जैसीको घरमा गएर २ हजार रुपैयाँ नगद सहयोग गरेका हुन्।
  क्लबले आफ्ना नियमित कामसँगै समुदायमा आपतविपतको अवस्थामा सहयोग गर्नुपर्छ। त्यसै अनुसार आगलागीबाट पीडित भएकी तुलसी जैसीलाई सहयोग गरेको क्लबका अध्यक्ष नामकर खनालले जानकारी दिए। ‘हाम्रो चुलिमालिका साहित्यिक युवा क्लब स्थानीय स्तरमा विभिन्न काम गर्दै आएको छ,’ अध्यक्ष खनालले भने, ‘क्लबले आफ्ना नियमित गतिविधि पनि गरिरहेको छ। समुदायको हितको लागि स्थापना भएको क्लबले समुदायको आपतविपतको अवस्थामा सहयोग गर्नुपर्छ भन्ने उद्देश्यले हामीले यो सानो सहयोग रकम उपलब्ध गराएका हौं।’
  त्यस्तै अध्यक्ष नामकर खनालले संस्थाको आर्थिक अवस्थाले साथ दिएमा यस्ता सहयोग गर्दै जाने बताए।
क्लबका सचिव वेदप्रकाश ओलीले संस्थाको आफ्नो कोषबाट सहयोग गरेको बताए। ‘सदस्यता नविकरण तथा वितरणबाट जम्मा भएको रकमबाट सहयोग गरेको हौं,’ उनले भने।
क्लबको सहयोगबाट राहत भएको महसुस गरेको पीडित तुलसी जैसीले बताइन्। ‘क्लबको सहयोगले मलाई राहत महसुस भएको छ। सबै जलेर नष्ट हुँदा खरानी मात्र पाएका हामीले यो सहयोगले राहतको महसुस गराएको छ।’
सहयोग हस्तान्तरणमा अध्यक्ष नामकर खनाल, सचिव वेदप्रकाश ओली, कोषाध्यक्ष जानकी रावल बटाला लगायत स्थानीयको सहभागीता रहेको थियो।