अक्षर साथी | २०८१ चैत्र ८ गते ०८:२१ मा प्रकाशित

अक्षर साथी
लम्की/चैत्र ९
  चैत्र महिनाको मध्यतिर आइपुग्दा देशभर तापक्रम क्रमिक रूपमा बढ्दै गएको छ । मौसम विभागका अनुसार, आज काठमाडौंको अधिकतम तापक्रम २८ डिग्री सेल्सियस पुगेको छ भने तराईमा ३० डिग्री नाघेको छ । गर्मीको यो समयमा शरीरलाई स्वस्थ र तन्दुरुस्त राख्न खानपान र जीवनशैलीमा विशेष ध्यान दिनुपर्ने स्वास्थ्य विज्ञहरूले सुझाएका छन् । गर्मी बढेसँगै स्वस्थ रहन यस्ता के कस्ता कुरामा दिने? खानपान र सावधानीमा ध्यान दिँदा स्वस्थ जीवनशैली कायम गर्न सकिन्छ ।
 आउनुस्, चिकित्सक के भन्छन् ? हेरौँ ।
   चिकित्सकका अनुसार, गर्मीमा डिहाइड्रेशन र थकानबाट बच्न पानी र तरल पदार्थको सेवन बढाउनुपर्छ । दिनमा कम्तीमा ३ लिटर पानी पिउनुका साथै नरिवल पानी, कागतीपानी, लस्सी र फलफूलको जुस उपयोगी हुने चिकित्सकको राय छ । मौसमी फलफूलजस्तै खरबुजा, तरबुजा, स्याउ र सुन्तलाले शरीरमा पानीको कमी पूरा गर्नुका साथै भिटामिन र खनिज प्रदान गर्छ । हरियो सागसब्जी, काँक्रो र फर्सीले पनि ताजगी कायम राख्छ । 
  बर्दगोरिया अस्पतालका मेडिकल अधिकृत डा. प्रकाश तिमिल्सेना गर्मीमा भारी र तारेको खाना कम खान सुझाव दिन्छन् । ‘मसालेदार र तेलयुक्त खानाले पाचन प्रणालीमा समस्या ल्याउन सक्छ ।,’ डा. तिमिल्सेना थप्छन्, ‘बरु, दाल, रोटी, हल्का सुप र जाउलो जस्ता सुपाच्य खाना उपयुक्त हुन्छ। प्रोटिनका लागि माछा र अण्डा पनि राम्रो विकल्प हो ।’ 
  यसबाहेक, गर्मीमा छाला र स्वास्थ्य जोगाउन केही सावधानी अपनाउनुपर्छ । बिहान ११ देखि दिउँसो ३ बजेसम्म घामको प्रत्यक्ष सम्पर्कबाट बच्न, हल्का रङ्गको सुती कपडा लगाउन र नियमित सनस्क्रिन प्रयोग गर्न विज्ञहरूको सुझाव छ । साथै, लामो समय घाममा काम गर्नुपर्दा टोपी र चस्माको प्रयोग गर्नुपर्छ । 
गर्मी बढेसँगै खानपान र सावधानीमा ध्यान दिँदा स्वस्थ जीवनशैली कायम गर्न सकिन्छ ।’