अक्षर साथी | २०८१ चैत्र ७ गते १८:१८ मा प्रकाशित

अक्षर साथी
लम्की/चैत्र ८ 
  करिब हप्तादिन अगाडि, शनिबार साँझ साढे ७ बजे कैलालीको लम्कीचुहा–२ मोतिपुरका युवा कमल रावलमाथि सांघातिक हमला भयो। गाडी सहित उभिएको प्रहरीको सामुन्ने नै १२÷१३ जनाको समूहले ज्यान मार्ने उद्देश्यले धारिलो हतियार प्रयोग गर्दै निर्भय रूपमा गरेको आक्रमणलाई निक्कै शंकाको नजरले हेरिएको थियो।
घटना भएको हप्तादिन बितिसक्दा पनि प्रहरीले कुनै नतिजा निकाल्न सकेको छैन। इलाका प्रहरी कार्यालयका प्रहरी निरीक्षक लोकेन्द्र सिंहका अनुसार पक्राउ पुर्जी जारी भएका ७ जनामध्ये कसैलाई पनि पक्राउ गर्न सफल भएको छैन।
‘हामीलाई पक्राउ पुर्जी ल्याउन केही समय लाग्यो। सार्वजनिक विदा र जाहेरीमा भएका नाम संशोधन गर्नुपर्ने अवस्थाले गर्दा पक्राउ पुर्जी आउन समय लागेको हो,’ प्रहरी निरीक्षक लोकेन्द्र सिंहले भने, ‘हामी आरोपीलाई खोज्ने काम तीव्र रूपमा गरिरहेका छौँ। अहिलेसम्म (यो समाचार तयार पार्दासम्म) पक्राउ भएका छैनन्। हामी आरोपीको खोजी कार्यमा जुटेका छौँ।’
यता, खुकुरी प्रहारबाट घाइते भएका कमल रावलका बुवा शेर बहादुर रावलले जाहेरी दिएकालाई कानुनी कठघरामा ल्याउन भइरहेको ढिलाइले पीडा थपिएको प्रतिक्रिया दिएका छन्।
‘घरमै मान्छेलाई मार्ने उद्देश्यले प्रहरीकै अगाडि खुकुरी प्रहार गर्ने काम भएको छ, जुन म लगायत सम्पूर्ण लम्कीचुहावासीका लागि दुःखद कुरा हो,’ बुवा रावलले भने, ‘अझै जाहेरी दिएर पक्राउ गर भनेका अहिलेसम्म कानुनी कठघरामा आएका छैनन्। समयमा न्याय पाएको भए एउटा कुरा हुने थियो, ढिलाइले पीडा थपेको छ।’
कसरी भएको थियो घटना?
शनिबार साँझ ६ बजे अनुप शाही लगायतका युवा समूह इलाका प्रहरी कार्यालयमा गएर निवेदन दिएका थिए। प्रहरीका अनुसार निवेदनमा कमल रावलले निवेदक अनुप शाहीलाई बन्धक बनाएको, हतियार देखाउँदै यातना दिएको आरोप लगाइएको थियो। प्रहरी निरीक्षक लोकेन्द्र सिंहका अनुसार निवेदन गम्भीर प्रकृतिको भएकोले प्रहरी तुरुन्तै ‘एक्सनमा’ गएको थियो।
‘बन्धक बनाएको, हतियार देखाउँदै यातना दिएको विषय गम्भीर भएकाले प्रहरी एक्सनमा गयो। त्यसपछि प्रहरीको एक टोली गाडी र चार÷पाँच जना प्रहरी लिएर कमल रावलको घरमा पुगेको थियो,’ प्रहरी निरीक्षक सिंहले भने, ‘प्रहरी कमल रावलका बुवासँग कुरा गरिरहेको अवस्थामा कमल रावल भने घरको पछाडिबाट भाग्ने कोसिस गर्दै थिए। त्यसै अवस्थामा नजानिँदो समूह आयो र धारिलो हतियार प्रयोग गर्दै आक्रमण गर्न थाल्यो। नजिकै रहेको प्रहरीले हुलमुलमा गएर घाइते कमल रावलको उद्धार गर्यो।’
प्रहरीले कमल रावललाई उपचारका लागि शनिबार राति लम्कीचुहा अस्पताल पु¥याएको थियो। त्यहाँ उपचार सम्भव नभएपछि उनलाई सोही राति धनगढीस्थित मायामेट्रो अस्पतालमा लगिएको थियो, जहाँ उनको उपचार भइरहेको छ।
अहिले उनको अवस्था सामान्य रहेको बुवा शेर बहादुर रावलले जानकारी दिएका छन्।
घटनाको पछिल्लो दिन अर्थात् आज आइतबार घाइते रावलका आफन्त तथा स्थानीयवासीले केहीबेर पूर्व–पश्चिम राजमार्ग अवरुद्ध पारेका थिए। प्रहरीले किटानी जाहेरी ल्याएपछि आफू जुनसुकैलाई पनि पक्राउ गर्न तयार रहेको आश्वासन दिएपछि सहमति भएको थियो।
यो घटनाले प्रहरीको भूमिका, सुरक्षा व्यवस्थापन र अपराध नियन्त्रण प्रक्रियामाथि गम्भीर प्रश्न खडा गरेको छ।