अक्षर साथी | २०८१ चैत्र २६ गते १८:४१ मा प्रकाशित

अक्षर साथी
लम्की/चैत्र २७
  चिसापानी–कुईने सडक निर्माणमा भइरहेको ढिलाइको विषयलाई लिएर युवाहरू कर्णाली चिसापानी पुलमा अनशन बस्ने भएका छन् । बुधवार चिसापानीमा पत्रकार सम्मेलनको आयोजना गर्दै ६ वर्ष अगाडि सम्झौता भई काम सुरु भएको तर हालसम्म रुख कटानी आदेश नआएको कारणले भइरहेको ढिलाइ विषयमा नेत्र भण्डारीसहितका युवाहरू भोलि (बिहीवार) चिसापानी पुलको बीचमा सुतेर अनशन बस्ने जानकारी गराइएको छ ।
  सडक निर्माणको विषयमा सबै काम भइसकेका छन् । मात्र ४ सय ७२ रुख कटानको आदेश नआँदा काममा ढिलाइ भएकोले आफूहरू अनशनमा बस्न बाध्य भएको नेत्र भण्डारीले बताए । ‘एक जना कर्मचारीका कारण ८ जिल्लासँग जोडिएको महत्वपूर्ण सडक निर्माणको काममा ढिलाइ भएको छ,’ भण्डारीले भने, ‘पछिल्लो १५ दिन यतादेखि सरकारसमक्ष रुख कटान आदेशको माग गर्दै हामीले सरकारलाई हाम्रा कुरा सुनाउँदै अल्टिमेटम दिएका थियौं । तर, सरकारले हाम्रा कुरा नसुनेपछि हामी चिसापानी पुलको बीचमा ढुङ्गाको सिरानी बनाउँदै सुतेर अनशन बस्नेछौं।’
त्यस्तै, भण्डारीले रुख कटानीको आदेश आएमा आफ्नो आन्दोलन स्थगन हुने कुरा पनि बताएका छन् ।
किन भइरहेको छ ढिलाइ ?
‘एक निर्वाचन क्षेत्र, एक रणनीतिक महत्वको बाटो’ योजना अनुसार तत्कालीन संघीय सांसद झपट बहादुर रावलले चिसापानी–खिमडी सडक रोजेका थिए । जसको पहिलो खण्ड चिसापानी–कुईने सडक खण्डका लागि २५ करोड रुपैयाँ संघीय सरकारबाट बजेट विनियोजन गरिएको थियो । ०७८ चैतमा भएको ठेक्का ०७९ असार ३ मा दिव्यज्योति–शाही जे.भी.ले मूल्य अभिवृद्धि करसहित १२ करोड ८० लाख ८१ हजार ३ सय ५७ रुपैयाँ दुई पैसामा ठेक्का पाएको थियो । जसअनुसार ५ मिटर कालोपत्रे रहने गरी ९ मिटर चौडाइ सहितको साढे सात किलोमिटर सडक निर्माणको काम ०८१ असार ३ मा सम्पन्न हुनुपर्ने थियो । तर सडक निर्माण क्षेत्रमा परेका ४ सय ७२ रुखको कटान आदेश नआएका कारण सडक निर्माणमा ढिलाइ भइरहेको छ । सडक निर्माणको शिलान्यस ०७९ साउनमा तत्कालीन साँसद झपट बहादुर रावलले गरेका थिए ।
किन रुख कटानको आदेश आएको छैन ?
  नेपाल सरकारले सडक निर्माणका लागि बजेट विनियोजन गरेर सडक निर्माण सम्पन्नका लागि आवश्यक निर्देशन दिइसकेको भए पनि वन मन्त्रालयअन्तर्गतको वन विभागका कर्मचारीका कारण रुख कटानको आदेश नआएको दाबी नेत्र भण्डारीको रहेको छ । ‘नेपाल सरकारले चिसापानी सडक खण्डका लागि आवश्यक बजेटको व्यवस्था र निर्देशनहरू दिइसकेको छ। अर्थ मन्त्रालय तथा कानुनमा भएका बाधा अड्काउ फुकुवा भइसकेका छन्,’ भण्डारीले भने, ‘गर्नु पर्ने, हुनु पर्ने सबै काम भइसकेको छ । मात्र रुख कटानको आदेश दिने एक जना कर्मचारीका कारण ८ जिल्ला जोडिएको महत्वपूर्ण बाटो निर्माणको काम रोकिएको छ ।’
  त्यस्तै, भण्डारीले वन मन्त्रालय विकासको बाधक भएको बताउँदै नेपाल सरकारको निर्देशनको अवज्ञा गर्ने कर्मचारीलाई कारबाही गर्नुपर्ने समेत बताएका छन् । 
यता निर्वतनमा साँसद झपट बहादुर रावल भने फाइल सडक विभागको वातावरण शाखामा पुगे सकेको जानकारी दिएका छन् ।
  ‘चिसापानी–कुइने सडकको रुख कटानको आदेशको फाइल धेरै मेहनत र पहलका साथमा सडक विभागको वातावरण शाखामा आइपुगेको छ । त्यस्तै सेती लोकमार्गको फाइल भौतिक मन्त्रालयको वातावरण शाखामा प्रतिवद्धता पत्र लागी पुगेको छ ।’ निर्वतमान साँसद रावलले जानकारी दिए ।
 अछामका तत्कालीन जिल्ला पञ्चायत सभापती हरि भण्डारीले २०२५ साल नेपालगन्जबाट एउटा जिप किनेर चिसापानी–जंगलघाटकै बाटो हुँदै बोकाएर अछाम सदरमुकाम मंगलसेनसम्म पु¥याए । बोकेर मोटर पु¥याएको ५४ वर्ष बितिसक्यो, तर यो बाटोमा पूर्णरुपले मोटर अझै गुडेको छैन ।