प्रशासक | २०८२ बैसाख ३० गते १७:३० मा प्रकाशित

अक्षर साथी
लम्की/ बैशाख ३०
  कैलालीको लम्कीचुहा नगरपालिकाले आगामी आर्थिक वर्ष २०८२/०८३ का लागि नीति तथा कार्यक्रम ल्याएको छ । मंगलवार नगरपालिकाको १५ औँ नगर सभाको पहिलो बैठकबाट नगरपालिकाले आर्थिक वर्ष ०८२/०८३ का लागि नीति तथा कार्यक्रम ल्याएको हो । 
नगर प्रमुख सुशीला शाहीले १५ औँ नगर सभामा पेश गरेको नीति तथा कार्यक्रममा कृषि, रोजगारी, पूर्वाधार विकास र सामाजिक समावेशीताको सन्तुलित संयोजनमार्फत समृद्धिको बाटोमा अघि बढ्ने देखिएको छ । 
नीति तथा कार्यक्रमका प्रमुख प्राथमिकताहरुमा कृषिमा आत्मनिर्भरता, युवा रोजगारी सिर्जना, पूर्वाधार विकास, शिक्षाको गुणस्तर सुधार, वातावरणीय संरक्षण, सुशासन र नागरिक सेवा प्रवाहलाई सुदृढ बनाउने योजना उल्लेख गरिएको छ ।
  आगामी आर्थिक वर्षमा लम्कीचुहा कृषि उत्पादनमा आत्मनिर्भरता लक्ष्य बन्न लिएको छ । लम्कीचुहाले कृषि क्षेत्रमा नविनतम प्रविधिको प्रयोग गर्दै स्थानीय उत्पादनमा आत्मनिर्भर हुने योजना अघि सारेको छ । ‘एक वडा एक विशेष कृषि कार्यक्रम’ मार्फत कृषिजन्य उत्पादनको पहिचान र प्रवद्र्धन गरिने,  कृषिमा यान्त्रीकरण, सिंचाइ विस्तार, बीउ अनुदान, भण्डारण तथा बजारीकरणलाई प्राथमिकता दिइने नीति तथा कार्यक्रम रहेको छ । 
  नगर प्रमुख सुशीला शाही कार्यकालको चौथो नीति कार्यक्रममा बढ्दो बेरोजगारी समाधान गर्न नगरपालिकाले सीप विकास तालिम, व्यवसायिक प्रोत्साहन तथा उद्यमशीलताको विकासमा जोड दिने नीति लिएको छ । यसैगरि  लघु, घरेलु तथा साना उद्योगहरुको प्रवद्र्धन गरी स्थानीय उत्पादन र रोजगारीको अवसर बढाउने नीति लिइएको । त्यस्तै पूर्वाधार र समृद्धितर्फ भौतिक पूर्वाधारको सुदृढीकरण मार्फत दिगो विकास र समृद्ध पालिका निर्माणलाई अगाडि सारिएको छ । सडक विस्तार, खानेपानी, ढल व्यवस्थापन, नाली निर्माण, सार्वजनिक भवन निर्माणजस्ता योजना समेटिएका छन् ।
शिक्षा, स्वास्थ्य र वातावरणतर्फ गुणस्तरीय शिक्षाका लागि डिजिटल शिक्षाको प्रवद्र्धन, शिक्षक तालिम, विद्यालय भौतिक पूर्वाधार सुधार लगायतका कार्यक्रम समावेश छन् । स्वास्थ्य क्षेत्रमा प्राथमिक स्वास्थ्य सेवा पहुँच वृद्धि र गुणस्तर सुधारमा ध्यान दिइएको छ । साथै, वातावरण संरक्षणका लागि हरियाली विस्तार, फोहोर व्यवस्थापन र जलवायु अनुकूलन रणनीति अपनाइने नीति लम्कीचुहाको रहेको छ । 
महिला, बालबालिका, दलित, अपांगता भएका व्यक्ति, ज्येष्ठ नागरिक लगायतको अधिकार सुनिश्चित गर्न लक्षित कार्यक्रम अघि सारिएको छ। डिजिटल प्रशासन, सेवा प्रवाह सहज र पारदर्शी बनाउने योजना नीति तथा कार्यक्रममा उल्लेख गरिएको छ ।
‘लम्कीचुहा समृद्धिको आधार : शिक्षा, कृषि, पर्यटन र पूर्वाधार’ को उदेश्यलाई लाई यही नीति तथा कार्यक्रमबाट प्राप्त गर्ने नगरपालिकाको अपेक्षा गरेको छ । 
लम्कीचुहाको नीति तथा कार्यक्रम हेर्नको लागि यहाँ क्लिक गर्नुहोला ।