प्रशासक | २०८२ मंसिर १६ गते ११:३० मा प्रकाशित

अक्षर साथी
लम्की, मंसिर १५
  कैलालीको लम्कीचुहा–१०, चुहा चोकमा सोमबार बिहान २ बजे ज्यानमारा दुर्घटना भयो—जीए–०७–एल–८७११ नम्बरको भारतीय कार ठ्याक्कै राजमार्गको बीचमा गाडिएको हाइमास्ट पोलमा ठोकियो। चार जना सवारमध्ये दुईको अवस्था गम्भीर छ । यसअघि गत साउन १० मा सुप्र ०१००१ ख २७८१ नम्बरको ट्रक पनि यस्तै गरी त्यही स्थानमा पोलमै ठोकिएकाले सहचालक घाइते भएका थिए र पोल पूर्ण रूपमा क्षतिग्रस्त बनेको थियो ।
 एकै ठाउँमा पटक–पटक दुर्घटना भइरहनु सामान्य कुरा होइन, यो प्राकृतिक संयोगभन्दा पनि मानवनिर्मित लापरबाहीको परिणाम हो । जोखिमपूर्ण रूपमा ठड्याइएका पोलहरू आज दुर्घटनाको कारण बन्दैछन्, तर सम्बन्धित निकाय भने बेखबरझैँ मौन छन् ।
  पूर्वपश्चिम राजमार्गसहित देशभरिका ८० राजमार्गको निर्माण, विस्तार, सुधार र मर्मत–सम्भारको जिम्मेवारी सडक विभागकै हो। ‘सडक विभागको स्वीकृति बिना सडक सीमाभित्र किला, लट्ठा, पर्खाल, पोल आदि गाड्न नपाइने,’ सडक ऐनमा स्पष्ट व्यवस्था छ । तर यही कानुनलाई तोड्ने सरकारी निकायहरू स्वयं बन्नु विडम्बना हो ।
  कानुनको ठाडो उल्लंघन गर्दै मनलाग्दी तरिकाले यातायातका साधन आवतजावत गर्ने मुख्य राजमार्गको बीचैमा पोल ठडाउने काम गरिएको छ । पटक–पटकका घटनाले यसलाई प्रमाणित गरेका छन् । दुःखद कुरा के छ भने , राजमार्गको बीचमा पोल राख्दा दुर्घटनाको जोखिम बढ्छ, हुने दुर्घटनामा अमूल्य ज्यान जान सक्छ, तर पोलहरू तबसम्म हटाइँदैनन् जबसम्म कुनै दुर्घटना हुँदैनन् ।
  सडक विभाग अन्तर्गतको सडक डिभिजन महेन्द्रनगरका प्रमुख सि.डि.ई.राजेश कुमार यादवका अनुसार, केही समयअघि लम्कीचुहा नगर प्रमुख सुशीला शाहीसँगको कुराकानीमा आफूले सकेसम्म राजमार्गको बीचमा पोल नराख्न र यदि राख्नै परे आवतजावत सुरक्षित हुने गरी राख्ने कुरा भएको बताए । पोललाई गालो पर्खाल बनाएर राख्ने कुरा भए पनि हालसम्म भएको छैन । लम्कीचुहाको मिनिमार्केट, लम्की चौराहा र बसपार्क गेट (पूर्व) गरी तीनवटा पोल राजमार्गको बीचै छन् ।
  काम गर्ने क्रममा कहिलेकाहीँ त्रुटि हुन सक्छ । तर बारम्बारका दुर्घटनाले प्रमाणित त्रुटिलाई पनि सच्याउन ढिलाइ गर्नु घोर गैरजिम्मेवारी हो । राजमार्ग सार्वजनिक सम्पत्ति हो, यसको संरक्षण हाम्रो सामूहिक दायित्व । साथै, राज्यका निकायको दायित्व अझ उच्च र प्रत्यक्ष हुन्छ । यात्रीलाई सुरक्षित, सहज र विश्वसनीय यात्रा सुनिश्चित गर्नु ।
 आज पनि लम्की मिनिमार्केट, लम्की चौराहा र बसपार्क गेट (पूर्व) गरी तीनवटा हाइमास्ट पोल राजमार्गको बीचमै उभिएका छन्, ती नै सम्भावित मृत्युका धराप हुन् ।
नगर प्रमुख सुशीला शाहीसँग यस विषयमा प्रतिक्रिया लिन खोज्दा यो तयार पार्दासम्म सम्पर्क सफल भएन ।
 राजमार्गका बीचमा ठडिएका यी हाइमास्ट पोलहरू सार्न यथाशीघ्र पहल हुन्छ, कि फेरि अर्को दुर्घटना कुर्नु पर्ने हो ?