प्रशासक | २०८२ पौस ६ गते १९:२३ मा प्रकाशित

अक्षर साथी
लम्की, पुस ६ 
  इसाई धर्मावलम्बीको वडा दिन अर्थात ख्रीष्टमस पर्वको अवसर पारेर कैलालीको लम्कीचुहा नगरपालिकामा इसाई समुदायबीच शुभकामना आदान–प्रदान कार्यक्रम सम्पन्न भएको छ । इसाई समाज लम्कीचुहाको आयोजनामा गरिएको कार्यक्रम लम्कीचुहा नगरपालिकाभित्रका ४२ वटा मण्डलीबाट इसाई समुदायका प्रतिनिधि, धर्मगुरु तथा भक्तजनहरूको उल्लेखनीय सहभागिता रहेको थियो । कार्यक्रमले आपसी सद्भाव, भाइचारा र सामाजिक एकताको सन्देश प्रवाह गरेको छ ।
  कार्यक्रमलाई सम्बोधन गर्दै प्रमुख अतिथि तथा इसाई समाज नेपालका राष्ट्रिय अध्यक्ष चन्द्र बहादुर थापाले ख्रीष्टमस पर्वले प्रेम, करुणा र मानव सेवाको सन्देश दिने बताए ।
‘ख्रीष्टमस केवल धार्मिक उत्सव मात्र होइन, यो मानवता, शान्ति र सहिष्णुताको पर्व हो,’उनले भने ।
त्यस्तै कार्यक्रमका विशिष्ट अतिथि तथा इसाई समाज नेपालका संस्थापक अध्यक्ष जन्मजय भट्टराईले अन्धकारमा रहेको दुनियलाई उज्यालो बनाउन र मानव जातीको भलोका लागि परमेश्वरेको अतुलनीय योगदान रहेको बताए ।  
  कार्यक्रमका विशिष्ट अतिथि देवानन्द जैसीले परमेश्वर पिताको अनुग्रह प्रेम र शान्ति हामी सबैका बीचमा सदैव रहोस् भन्दै आफ्नो शुभकामना मन्तव्य व्यक्त गरे ।   
 विशिष्ट अतिथि एस.के. पुरीले ख्रीष्टमसको सन्देश व्यवहारमा उतार्नुपर्नेमा जोड दिए । ‘प्रेम र क्षमाको भावना जीवनमा लागू गर्न सके मात्र ख्रीष्टमसको सार्थकता हुन्छ,’ उनको भनाइ थियो ।   
  कार्यक्रमका सभाध्यक्ष तथा इसाई समाज लम्कीचुहाका अध्यक्ष चेतराज शर्माले इसाई समुदाय सधैँ समाजमा शान्ति र सद्भाव कायम गर्न सक्रिय रहँदै आएको उल्लेख गर्दै कार्यक्रमलाई सभ्य र भव्यताका साथ सम्पन्न गर्नमा भूमिका निर्वाह गर्ने सम्पूर्णमा धन्यवाद व्यक्त गरे । 
  कार्यक्रमअघि बाजागाजा र नृत्यसहित लम्की बजार परिक्रमा गरिएको थियो । बजार परिक्रमापछि सभामा परिणत भएको कार्यक्रममा लम्कीचुहा नगरपालिकाका ४२ वटा मण्डलीबाट इसाई समुदायका प्रतिनिधि, धर्मगुरु तथा भक्तजनको उल्लेखनीय सहभागिता रहेको थियो ।
 उत्साहपूर्ण र शान्त वातावरणमा सम्पन्न कार्यक्रमले लम्कीचुहामा धार्मिक सहिष्णुता र सामाजिक एकताको सन्देश प्रवाह गरेको आयोजक इसाई समाज लम्कीचुहाले जनाएको छ ।