प्रशासक | २०८२ माघ २२ गते १५:३७ मा प्रकाशित

कैलाली डेस्क
लम्की, माघ २१
   नेकपा एमालेले कैलाली निर्वाचन क्षेत्र नं. २ अन्तर्गत लम्कीचुहा नगरपालिका वडा नं. ८ को बचैलामा वडा सम्पर्क कार्यालय स्थापना गरेको छ । बुधबार आयोजित एक कार्यक्रमकाबीच पार्टीका केन्द्रीय सदस्यहरू झपट बहादुर रावल, कमला कुमारी ओली र पवित्रा तिमिल्सेना तथा प्रतिनिधिसभा सदस्य पदका उम्मेदवार सूर्य बहादुर थापाको उपस्थितिमा कार्यालय उद्घाटन गरिएको हो ।
   कार्यक्रममा बोल्दै प्रतिनिधिसभा सदस्य पदका उम्मेदवार थापाले कैलाली क्षेत्रको सर्वाङ्गीण विकासका लागि आफू निरन्तर खटिने प्रतिबद्धता व्यक्त गरे । उनले शिक्षा, स्वास्थ्य, रोजगारी, पूर्वाधार र कृषि विकासलाई प्राथमिकतामा राखेर जनताको अपेक्षा अनुसार काम गर्ने       बताए । ‘जनताको भरोसा र समर्थनलाई कामबाटै प्रमाणित गर्नेछु,’ थापाले भने ।
   उद्घाटन कार्यक्रममा एमालेका नेता डेजी पाण्डे, महादेव बजगाईं, बखत बहादुर बिष्ट लगायत स्थानीय नेता कार्यकर्ताहरूको समेत उल्लेख्य उपस्थिति रहेको थियो । सहभागी वक्ताहरूले आगामी निर्वाचनमा पार्टीको जित सुनिश्चित गर्न वडास्तरबाटै संगठन सुदृढ गर्दै जनसम्पर्कलाई अझ तीव्र बनाइने धारणा राखे ।
    वडास्तरमै संगठन विस्तार, जनतासँगको प्रत्यक्ष सम्पर्क बढाउने र पार्टीका नीति तथा कार्यक्रम प्रभावकारी रूपमा कार्यान्वयन गर्ने उद्देश्यले वडा सम्पर्क कार्यालय स्थापना गरिएको नेकपा एमालेले जनाएको छ । कार्यालय स्थापनासँगै लम्कीचुहा नगरपालिका वडा नं. ८ मा पार्टी गतिविधि थप सक्रिय हुने विश्वास लिइएको छ ।