प्रशासक | २०८१ फाल्गुन २० गते १४:०७ मा प्रकाशित

अक्षर साथी  लम्की, फागुन २० गते ।

  कैलालीको लम्कीचुहा नगरपालिकाद्वारा किसान बहुउद्देश्यीय सहकारी संस्था लि. लम्कीलाई शीतगृह हस्तान्तरण गरेको छ । मंगलवार एक कार्यक्रमबीच लम्कीचुहा नगरपालिकाकी नगर प्रमुख सुशीला शाहीले किसान बहुउद्देश्यीय सहकारी संस्था लि. का अध्यक्ष सुरेन्द्र कुमार शाहलाई हस्तान्तरण पत्र प्रदान गर्दै सो शीतगृहको हस्तान्तरण गरेकी हुन् ।
  कृषि विकास निर्देशनालय, दिपायलको आर्थिक वर्ष २०७८/०७९ मा ५६ लाख रुपैयाँको लागतमा निर्माण गरिएको हो । कृषि विकास निर्देशनालय, दिपायलले लम्कीचुहा नगरपालिकालाई ०८० कात्तिकमा हस्तान्तरण गरेको यो शीतगृहलाई किसानको कृषि उपजको बजार सहजिकरणका लागि नगरपालिकाले किसान सहकारीलाई हस्तान्तरण गरेको हो ।
  हस्तान्तरण गरिएको शीतगृहको उचित प्रयोग, संरक्षण, मर्मत सम्भार र सञ्चालनको सम्पूर्ण जिम्मेवारी किसान सहकारीको रहने बताउँदै लम्कीचुहाका कृषकलाई सहज होस् भन्ने आफूले विश्वास लिएको नगरपालिकाकी प्रमुख प्रशासकीय अधिकृत सुषमा महत के.सी. ले बताइन् । शीतगृहको उचित तरिकाले सञ्चालन गर्दै कृषि उपजमा राष्ट्रियस्तरसम्मको योगदान पुगोस् भन्ने अपेक्षा लिएको प्रमुख प्रशासकीय अधिकृत के.सी. को भनाइ रहेको थियो ।
  महाप्रबन्धक डम्बर शाहले तरकारी खरिदमै देशको अर्ब रुपैयाँभन्दा धेरै बाहिर गइरहेको अवस्था रहेको बताउँदै अब शीतगृह सञ्चालनमा आइसकेकाले तरकारी खेती गर्ने किसान सहकारीका सदस्यलाई सुनौलो अवसर आएको बताए । ‘सुदूर प्रदेश सरकार र लम्कीचुहा नगरपालिकालाई धन्यवाद । तरकारी खरिदमै देशको अर्ब रुपैयाँ बाहिर गएको छ । यता शीतगृह सञ्चालनमा आएको छ । खेती गर्ने कृषक र किसान सहकारीका सदस्यलाई सुनौलो अवसर आएको छ । तपाईंहरू उत्पादनमा जोड दिनुस्, हामी अझै यस्ता कोल्ड स्टोर थप्न तयार छौं,’ महाप्रबन्धक शाहको भनाइ रहेको थियो ।
  किसान सहकारीका कृषि उपसमितिका संयोजक मनिष न्यौपानेले शीतगृहको हस्तान्तरणले किसान सहकारीले सञ्चालन गरिरहेको कृषि प्रयोजनलाई टेवा पुगेको बताए । साथै, नगरपालिकाले कृषि उपजलाई बजारसँग जोड्न ठोस कार्यक्रम ल्याउनु पर्ने बताए ।
  त्यस्तै किसान सहकारीका अध्यक्ष सुरेन्द्र कुमार शाहले नगरपालिकाले हस्तान्तरण गरेको शीतगृहलाई पूर्णरूपमा सञ्चालनमा ल्याइने बताए । ‘कृषकका उपजलाई शीतगृहमा राख्दा उत्पादनभन्दा लागत बढी लाग्छ । यसमा नगरपालिकाले किसानलाई उनीहरूका कृषि उपजको भण्डारणमा अनुदानको व्यवस्था गरिदियोस् । हामी शीतगृहको मर्मत सम्भार, संरक्षण गर्छौं, शीतगृहलाई पूर्णरूपमा सञ्चालनमा ल्याउँछौं,’ अध्यक्ष शाहले भने ।
 नगर प्रमुख सुशीला शाहीले कृषितर्फ धनगढीभन्दा सबैभन्दा बढी बजेट लम्कीचुहाले ल्याएको बताइन् । ‘२०/२५ पकेट कार्यक्रम सञ्चालनमा छन् । प्रचारप्रसार मात्रै नभएको हो । ११ करोडको अर्को कोल्ड स्टोर वडा नं. १ मा निर्माण हुँदैछ । मकै खेती राम्रो भएको छ, त्यस्तै चैते धानको खेतीको कुरा गरौं । पावर टेलर, ट्र्याक्टर, कृषि उपकरण, बीउ बिजन मलखाद वितरण गरिएको छ । कृषिमा धेरै काम भएका छन् । धनगढीपछि कृषिमा सबैभन्दा धेरै बजेट लम्कीचुहाले ल्याएको छ,’ नगर प्रमुख शाहीले भनिन् ।
 त्यस्तै नगर प्रमुख शाहीले किसान सहकारीलाई ५० लाखका लागि सम्झौता गरिसकिएको र थप ५० लाख रुपैयाँ दिन सकिने बताइन् । ‘कृषि उपजको भण्डारणका लागि अनुदान दिने भन्ने कुरा आएको छ । नगरपालिकालाई अनुदान कुनै समस्या छैन । उचित किसानलाई वर्गीकरण गरेर किसानलाई शतप्रतिशत अनुदान दिन्छौं । अहिलेको कोल्ड स्टोर (शीतगृह) ले किसानलाई फाइदा पुर्याओस् । किसान सहकारीलाई ५० लाखका लागि सम्झौता गरिसकिएको र थप ५० लाख रुपैयाँ दिन सकिन्छ,’ उनले भनिन् ।

के हो शीतगृह ?
शीतगृह भनेको कृषि उपज (फलफूल, तरकारी, अन्न, मासु, दुग्धजन्य पदार्थ आदि) जस्ता चाँडै बिग्रिने वस्तुहरूलाई लामो समयसम्म ताजा राख्नका लागि चिसो तापक्रममा भण्डारण गर्ने स्थान हो।

शीतगृहको उद्देश्यः

• कृषि उत्पादनलाई बिग्रिनबाट जोगाउने।
• बजारमा मूल्य वृद्धि वा माग बढ्दा उपयुक्त समयमा बेच्न सहयोग गर्ने।
• किसानको उत्पादनको संरक्षण गरेर आर्थिक नोक्सानीबाट जोगाउने।
• कृषि आपूर्ति श्रृंखलालाई व्यवस्थित र टिकाउ बनाउने।

शीतगृहका फाइदाः

• उत्पादनको दीर्घकालीन भण्डारण सम्भव हुन्छ।
• बजार मूल्य स्थिर बनाउन मद्दत गर्छ।
• किसानलाई थप आम्दानीका अवसर सिर्जना हुन्छ।
• उपभोक्ताले वर्षभरि ताजा उत्पादन प्राप्त गर्न सक्छन्।