प्रशासक | २०८१ चैत्र १३ गते १५:४२ मा प्रकाशित

अक्षर साथी
लम्की / चैत १४

सुदूरपश्चिम प्रदेशका मुख्यमन्त्री कमल बहादुर शाहले आफ्नो निर्वाचन क्षेत्रका दुई आयोजनाको शिलान्यास गरेका छन्। बिहीबार मुख्यमन्त्री शाहले आफ्नो निर्वाचन क्षेत्र कैलाली क्षेत्र नं. २ को १ मा रहेको हरैयाँपुरमा मरुवा र व्यवस्थित नगर खेलमैदानमा प्यारापिट योजनाको शिलान्यास गरेका हुन्।

लम्कीचुहा–७ को हरैयाँपुरमा निर्माण हुने मरुवाको शिलान्यास गर्दै मुख्यमन्त्री शाहले सुदूरपश्चिम सरकारले पहिलो पटक मरुवासहित मठमन्दिर जसले सुदूरपश्चिमको धर्म संस्कृति संरक्षण गर्न, प्रचारप्रसार र प्रवर्द्धन गर्नका लागि रातो किताबमा बजेट समावेश गरिएको बताए।
‘सरकारले सम्पूर्ण जातजाति, धर्म संस्कारलाई संरक्षण गर्नुपर्छ। आफूले मान्ने आस्था केन्द्रहरू फरक रहन सक्छन्,’ मुख्यमन्त्री शाहले भने, ‘मलाई लाग्छ सुदूरपश्चिम प्रदेश सरकार र केन्द्र सरकारले थारू जातिको देउथान मरुवा, परम्परागत रूपमा मान्दै आस्थाको केन्द्रको रूपमा आएको सन्दर्भमा प्रदेश सरकारले बजेटमै व्यवस्थापन गरेको छ।’

त्यस्तै, मुख्यमन्त्री शाहले प्रदेश सरकारबाट मरुवा निर्माणका लागि २ करोड रुपैयाँ विनियोजन भइसकेको जानकारी गराउँदै प्रत्येक पालिका, गाउँमा गरिने निर्माणमा प्रदेश सरकारले सहयोग गर्ने बताए।

लम्कीचुहा नगरपालिका–३ व्यवस्थित नगरमा निर्माण गर्न लागिएको १ करोड लागत बराबरको प्यारापिट शिलान्यासपछि मुख्यमन्त्री कमल बहादुर शाहले प्रदेश सरकार खेलकुदका संरचना निर्माण गर्ने अभियानमा अगाडि बढेको बताए।
‘खेलकुदका क्षेत्रमा बजेट निर्माण गर्दा जिल्लाका आधारमा बजेट निर्माण गरिएको हो। प्रदेशका जिल्लाहरूमा आवश्यक खेलमैदानका संरचनाहरू निर्माणका काम भइरहेका छन्,’ मुख्यमन्त्री शाहले भने, ‘अहिले यो व्यवस्थित नगर खेलमैदानमा भइरहेको प्यारापिट निर्माणका लागि गत वर्ष पनि बजेट विनियोजन भएको थियो। यो वर्ष थप १ करोड रुपैयाँ विनियोजन भएको छ। टीकापुर स्पोर्ट्स एकेडेमीको स्थापना भएको छ। त्यसैले प्रदेश सरकार खेलकुद क्षेत्रका संरचना निर्माण गर्न अभियानमा अगाडि बढेको छ।’

लम्कीचुहा नगरपालिकाका प्रवक्ता तथा वडा नं. ३ का अध्यक्ष लव बहादुर शाहीले मुख्यमन्त्री शाहले प्यारापिट निर्माणका लागि गरिएको बजेट व्यवस्थापनका लागि धन्यवाद व्यक्त गरेका थिए।