अक्षर साथी | २०८२ जेठ १८ गते २०:०९ मा प्रकाशित

अक्षर साथी
लम्की/जेठ १७

नेकपा एमालेका स्वर्गीय नेता मदन भण्डारीको विचार, योगदान र दृष्टिकोणलाई नयाँ पुस्तामा प्रसार गर्दै समाजमा सकारात्मक परिवर्तन ल्याउने उद्देश्यले मदन भण्डारी फाउण्डेसन, लम्कीचुहा नगर कमिटीको अध्यक्षमा बुद्धिमान जैसी (बसन्त) चयन भएका छन्।

शनिबार लम्कीचुहा–८ मा निर्माणाधीन पार्टी कार्यालयमा नेकपा एमालेका जिल्ला कमिटी सदस्य तथा लम्कीचुहा इन्चार्ज राम बहादुर बोगटी, जिल्ला सदस्य भद्र भण्डारी, लम्की बहुमुखी क्याम्पसका अध्यक्ष कर्ण बहादुर रावल, नेपाल बुद्धिजीवी परिषद् सुदूरपश्चिम प्रदेश कमिटी सदस्य लिलाजंग शाही, मदन भण्डारी फाउण्डेसनका जिल्ला सचिव मिन बहादुर रावल लगायत पार्टी तथा जनवर्गीय संगठनका पदाधिकारीहरूको उपस्थितिमा आयोजित भेलाले अध्यक्षमा बसन्त जैसीसहित १३ सदस्यीय कार्यसमितिको चयन गरेको हो।

समितिको अध्यक्ष बसन्त जैसी चयन भएका छन् भने, उपाध्यक्षमा टेक बहादुर रावल, सचिवमा दिनेश बोहरा र कोषाध्यक्षमा देविसरा भण्डारी चयन भएका छन्। त्यस्तै सदस्यहरूमा दुर्गा जैसी, दीपिका बिष्ट, राजेश महतरा, बलिराम चौलागाईँ, गोपी बहादुर रावल, प्रेम जोशी, नर बहादुर विक, सिता विक र कल्पना सोडारी चयन भएका छन्।

चयन गरिएको नयाँ समितिलाई बधाई तथा शुभकामना दिँदै नेकपा एमाले जिल्ला कमिटी सदस्य तथा लम्कीचुहाका इन्चार्ज राम बहादुर बोगटीले जननेता मदन कुमार भण्डारीको विचारलाई नयाँ पुस्तामा प्रचारप्रसार गर्दै पार्टीप्रति आकर्षण बढाउन सफल हुने विश्वास व्यक्त गरे। साथै, इन्चार्ज बोगटीले पुस्तकालय निर्माणमा आफ्नो सक्रिय भूमिका रहने बताए।

त्यस्तै लम्की बहुमुखी क्याम्पसका अध्यक्ष कर्ण बहादुर रावलले पार्टीलाई चलायमान राख्न र जिउँदो राख्न फाउण्डेसनको भूमिका महत्वपूर्ण रहेको बताए। उनले भने, “आज लम्कीचुहाको मदन भण्डारी फाउण्डेसनको कमिटीमा उचित नेतृत्व आएको छ। यसले आगामी दिनमा हुने निर्वाचनमा महत्वपूर्ण नतिजा दिलाउनेछ।”

फाउण्डेसनका जिल्ला सचिव मिन बहादुर रावलले यस कमिटीले सामाजिक कार्यहरू गर्ने विश्वास व्यक्त गर्दै आफू पूर्ण रूपमा सहयोगी रहने बताएका छन्।

मदन भण्डारी फाउण्डेसन कैलालीको जिल्ला अधिवेशन आगामी २३ जेठमा हुने भएको छ।

मदन भण्डारी फाउण्डेसन

मदन भण्डारी फाउण्डेसन जननेता मदन कुमार भण्डारीको स्मृतिमा स्थापित एक प्रतिष्ठित सामाजिक संस्था हो, जसको उद्देश्य उनको विचार, आदर्श र बहुदलीय जनवादको दर्शनलाई जीवन्त राख्नु हो। वि.सं. २०५७ मा स्थापना गरिएको यस फाउण्डेसनले शिक्षा, सामाजिक न्याय, नेतृत्व विकास, मानव अधिकार, महिला सशक्तिकरण, र लोकतान्त्रिक मूल्य–मान्यताहरूको प्रवर्द्धनका क्षेत्रमा काम गर्दै आएको छ।

फाउण्डेसनले जनताको बहुदलीय जनवादलाई व्यवहारिक रूपमा समाजमा लागू गर्ने अभियान अन्तर्गत विभिन्न कार्यक्रमहरू सञ्चालन गर्दै आएको छ, जस्तै– मदन भण्डारी मेमोरियल कलेज, अनुसन्धान केन्द्रहरू, युवा तथा खेलकुद प्रवर्द्धन, र सीपमूलक तालिमहरू। यस संस्थाले शैक्षिक वृत्तचित्र, पुस्तक प्रकाशन, गोष्ठी तथा सेमिनारहरू पनि आयोजना गर्छ, जसबाट समाजमा विवेकशील नेतृत्व र समावेशी विकासको अवधारणा स्थापित गर्न सहयोग पुग्दछ।

नेपालभर विभिन्न शाखामार्फत सक्रिय रहँदै आएको मदन भण्डारी फाउण्डेसन सामाजिक रूपान्तरण र समतामूलक समाज निर्माणमा समर्पित संस्था हो।