अक्षर साथी | २०८२ जेठ २२ गते १४:५७ मा प्रकाशित

अक्षर साथी
लम्की/जेठ २१
   संघीय सरकारले आर्थिक वर्ष २०८२/०८३ का लागि कैलालीका १३ स्थानीय तहलाई कुल ७ अर्ब ११ करोड १८ लाख रुपैयाँ बजेट विनियोजन गरेको छ । कैलालीमा एक उपमहानगरपालिका, छ नगरपालिका र छ गाउँपालिका गरी १३ स्थानीय तह छन् । चालु आर्थिक वर्ष २०८१/०८२ मा यी पालिकाहरूका लागि ६ अर्ब ७५ करोड ३२ लाख रुपैयाँ विनियोजन गरिएको थियो । यस हिसाबले आगामी आर्थिक वर्षका लागि बजेटको आकार ३५ करोड ८६ लाख रुपैयाँले बढेको देखिन्छ ।
 समग्र बजेट वृद्धि भए पनि केही नगरपालिकाहरूको बजेटमा भने कटौती भएको छ । खासगरी लम्कीचुहा नगरपालिकाको बजेटमा सबैभन्दा धेरै कटौती भएको छ । आर्थिक वर्ष २०८१/०८२ मा लम्कीचुहालाई ६२ करोड ८६ लाख रुपैयाँ विनियोजन गरिएको थियो, तर आगामी आर्थिक वर्ष २०८२/०८३ का लागि यो रकम ७ करोड ५७ लाखले घटेर ५५ करोड २९ लाख रुपैयाँमा झरेको छ ।
  लम्कीचुहा नगरपालिकाको सशर्त (पुँजीगत प्रकृतिको) अनुदानमा उल्लेखिय कटौती भएको छ । चालु आर्थिक वर्षमा यो शीर्षकमा ११ करोड ३२ लाख रुपैयाँ प्राप्त भएको थियो, तर आगामी वर्षका लागि यो रकम घटेर ४ करोड ८० लाखमा सीमित भएको छ । त्यस्तै लम्कीचुहाले आगामी आर्थिक वर्षको लागि विषेश अनुदान पनि पाएको छैन् । चालु आ.व.मा लम्कीचुहाले १ करोड १० लाखको विषेश अनुदान पाएको थियो । 
यसरी बजेट कटौती हुँदा नगरपालिकाको विकास निर्माणका योजनाहरूमा प्रत्यक्ष असर पार्ने देखिन्छ । 
  सशर्त अनुदान र विशेष अनुदानमामा भएको यो कटौतीले सडक, खानेपानी, ढल व्यवस्थापन, विद्यालय भवन निर्माण, स्वास्थ्य चौकीको स्तरोन्नति, सिँचाइ योजना र लक्षित वर्गहरू महिला, दलितलगायतका विषेश किसिमका कार्यक्रम र विकास निर्माणका कार्यहरू प्रभावित हुनेछन् विशेषगरी, पुँजीगत खर्चमा निर्भर ठूला परियोजनाहरूको प्रगति सुस्त हुने वा स्थगित हुन सक्ने सम्भावना छ ।