प्रशासक | २०८२ भाद्र १३ गते ०८:३३ मा प्रकाशित

लम्की/भदौ, १३
  नेपाल आइडल सिजन–२ बाट चर्चामा आएका गायक रवि शर्माले छोटो समयमै नेपाली संगीत क्षेत्रमा आफ्नो छुट्टै पहिचान स्थापित गरिसकेका छन् । सुमधुर स्वर र प्रस्तुतिको अद्वितीय शैलीका कारण उनी संगीतप्रेमीका प्रिय बनेका छन् ।
  हालै सार्वजनिक भएको “यो पागल दुनियाँ” गीतले फेरि एकपटक नेपाली संगीत क्षेत्रमा नयाँ सिर्जनात्मक कोसेली थपेको छ । कवि महेश दोस्ताजका शब्दमा आधारित यस गीतमा शब्द र स्वर दुवैमा गहिरो भावनात्मक प्रस्तुति भेटिन्छ ।
  गीतको टिजर सार्वजनिक भएयता नै यसबारे उत्सुकता बढेको थियो । टिजरले दिएको संकेतअनुसारै यो गीतले प्रेम, विछोड र जीवनका उतारचढावलाई समेट्दै श्रोतालाई संवेदनशील भावनात्मक यात्रामा डुबाएको छ । शर्माले आफ्नो स्वरमार्फत जीवनका पीडा, माया र संवेदनालाई आत्मीय ढंगले प्रस्तुत गरेका छन् ।
  गीतको अडियोतर्फ रवि शर्माको स्वर र महेश दोस्ताजका शब्दसँगै दुबैको संयुक्त संगीत समावेश छ भने संयोजन पुश्कर खत्रीले गरेका छन्  । रेकर्डिङ रियाज प्रोडक्सन स्टुडियोमा सम्पन्न भएको गीतको मिक्सिङ साजन शाहले गरेका हुन् ।
  भिडियो निर्देशन विकाश प्रसाईले गरेका छन् । प्रमुख भूमिकामा ईश्वरी बराल र सञ्जय ढुंगाना देखिएका छन् भने अन्य कलाकारमा कृष्ण घिमिरे, कुशल घिमिरे, यज्ञनिधि शर्मा, सुलभ शर्मा र सुनिल शर्माको पनि सहभागिता छ । सिनेमाटोग्राफी सुमन गहत्राजले गरेका छन् भने सम्पादन तथा कथा संरचना निर्देशक प्रसाईकै हातमा रहेको छ । रंग संयोजनमा कल्पेश विश्वकर्माको योगदान छ ।
  गीतको कथावस्तुमा प्रेम र विछोडलाई भावनात्मक ढंगले प्रस्तुत गरिएको छ । भिडियोको दृश्य र गीतका शब्दबीचको मेलले सिर्जनालाई अझै प्रभावकारी बनाएको छ ।
  निर्माणमा प्रविन आचार्य (सह–निर्माता) साथै वर्षा सिंह ठकुरी, गोविन्द खड्का र बाबु कृष्ण प्रसाइ संलग्न छन् ।
  साहित्यिक क्षेत्रमा पनि चर्चित कवि महेश दोस्ताजले यसलाई आफ्नो विशेष सिर्जना मानेका छन् । उनी भन्छन् “यो गीत शब्द मात्र होइन, भावनाको पनि प्रतिबिम्ब हो ।”
  संगीतकर्मी र श्रोता दुवैले यस गीतले बजारमा राम्रो स्थान पाउने विश्वास व्यक्त गरेका छन् । प्रेम र विछोडको संवेदनशील भावनाले ओतप्रोत “यो पागल दुनियाँ” श्रोतालाई रमाइलो मात्र नभई जीवनबारे सोच्न प्रेरित गर्ने अपेक्षा गरिएको छ ।