प्रशासक | २०८२ कार्तिक १९ गते ०७:४६ मा प्रकाशित

कैलाली डेस्क
लम्की, कार्तिक १८
  लम्की महोत्सव–२०८२ हुन अब २१ बाँकी रहेका छन् । लम्की महोत्सव कैलालीको लम्कीचुहामा आगामी मंसिर १० गतेदेखि २१ गतेसम्म हुने छ । जसको तयारी तिव्र रुपमा भइरहेको छ । 
  ‘सम्मुन्त लम्कीचुहाको आधार, शिक्षा, कृषि, पर्यटन, उद्योग र व्यापार’ नारा रहेको लम्की महोत्सव–२०८२ ले स्थानीय उत्पादन र संस्कृतिको प्रर्वधन गर्दै व्यापारिक चलायमान बनाउनका लागि आयोजना गर्न लागिएको आयोजक लम्कीचुहा उद्योग वाणिज्य संघले जनाएको छ । 
  ‘महोत्सव केवल मनोरञ्जनको माध्यम मात्र होइन, लम्कीचुहाको आर्थिक परिचय उजागर गर्ने अवसर पनि हो,’ लम्कीचुहा उद्योग वाणिज्य संघका अध्यक्ष पदमराज चौलगाइले भने, ‘ हामीले शिक्षामा गुणस्तर, कृषिमा आत्मनिर्भरता, पर्यटनमा आकर्षण र समग्र लम्कीचुहाको उद्योग व्यापारमा समृद्धिलाई जोड दिन खोजेका छौँ ।’
  लम्कीचुहा उद्योग वाणिज्य संघका महासचिव पुष्पराज ढकालका अनुसार यसपटकको महोत्सवमा कृषि, उद्योग, शिक्षा, स्वास्थ्य, पर्यटन र स्थानीय संस्कृतिका विशेष प्रदर्शनी, स्टलहरू, राष्ट्रिय तथा स्थानीय कलाकारका सांगीतिक प्रस्तुति, खाद्य तथा हस्तकला प्रदर्शनी लगायतका आकर्षक कार्यक्रम समावेश गरिने तयारी भइरहेको छ । त्यसका लागि स्टल बुकिङ्ग खुल्ला गरिएको र स्टल बुकिङ्गका लागि कार्यालयको सम्पर्क नं.०९१–५४०३३७ मा सम्पर्क गर्न पनि महासचिव ढकालले आग्रह गरेका छन् । 
  अध्यक्ष पदमराज चौलागाईँले मंसिर १० गतेदेखि २१ गतेसम्म सञ्चालन हुने लम्की महोत्सव–२०८२ सफल बनाउनका लागि संघ संस्था, व्यवसायी, विद्यार्थी र आम नागरिकको सहभागिता आवश्यक रहेको उल्लेख गर्दै सबैलाई साथ र सहयोगको लागि आग्रह गरेका छन् ।