अक्षर साथी | २०८२ मंसिर २१ गते ०९:५३ मा प्रकाशित

अक्षर साथी
लम्की, मंसिर २०
  सुदूरपश्चिम प्रदेश सरकारका मुख्यमन्त्री कमल बहादुर शाहले आफ्नो निर्वाचन क्षेत्र कैलाली–२ मा बिहीवार एकैपटक सातवटा महत्वपूर्ण योजनाको अनावरण तथा शिलान्यास गरे । मुख्यमन्त्री शाहले ‘चुनावी समयमा जनतासँग गरेका वाचा अनुरुप विकासका कार्यलाई तीव्रता दिएको’ बताउँदै बिहीवार एक रणनीतिक सडकसहित पाँचवटा सडकका सूचना पाटीको अनावरण र दुईवटा पुलको शिलान्यास गरेका हुन् ।
  सुदूरपश्चिमलाई सधैँ पिछडिएको क्षेत्र भन्ने दृष्टिकोणबाट नभई विकासका गतिविधिमा अघि बढेको प्रदेश बनाउन आफू प्रयत्नशील रहेको बताउँदै मुख्यमन्त्री शाहले सो दिन ४१ करोड ८७ लाख १६ हजार ६७७ रुपैयाँ लागतका योजनामध्ये सडकलाई १ वर्षमा र पुललाई २ वर्षमा निर्माण सक्ने बताएका   छन् ।
  मुख्यमन्त्री शाहका अनुसार पूर्व–पश्चिम राजमार्गस्थित रानी जमरा सिचाइ हाइड्रो इन्टेकदेखि कटाँसे, जगतपुर हुँदै टीकापुरसम्म जोडिने २ दशमलव ७ किलोमिटर लम्बाइको ‘केशर मार्ग’ ०८३ पुसमा सम्पन्न गर्नुपर्ने छ ।
  त्यस्तै लम्की खानेपानीदेखि राजकाँडासम्म पुग्ने ६ किलोमिटर सडक ०८३ पुसमा, जानकी गाउँपालिकाको सिमानासँग जोडिँदै थापापुर हुँदै चाकाँवाडीदेखि सेती लोकमार्गमा जोडिने लम्कीचुहा रिङ्गरोडको निर्माण कार्य ०८३ असारमा सम्पन्न गर्नुपर्ने छ ।
  साढे तीन किलोमिटरको डुडेझारी–टीकापुर सडक स्तरोन्नति ०८३ पुसमा सक्नुपर्नेछ भने साढे दुई किलोमिटरको चिसापानी सडक स्तरोन्नति ०८३ भदौमा सम्पन्न गर्नु पर्नेछ । मोहन्याल गाउँपालिकाका साघुरे खोला पुल र बादे खोला पुल निर्माण कार्य ०८४ असारमा सक्नुपर्ने छ ।
  सडकलाई १ वर्ष र पुललाई २ वर्षभित्र निर्माण सक्ने लक्ष्य लिइए पनि स्थानीयहरू भने योजनाहरू समयमै सम्पन्न हुनेमा विश्वस्त छैनन् । स्थानीयका अनुसार चिसापानी–कुईने–सोल्टा सडक निर्माण कार्यको शिलान्यास ०७८ चैतमा भएको थियो । सो सडकलाई ०८१ असारमा बनाउने भनिएको थियो । सो समयमा बनिसक्नुपर्नेमा थप डेढ वर्ष बितिसक्दा पनि सडक नबनेका कारण उनीहरू विश्वस्त     छैनन् ।
  यता राजनीतिक दलका स्थानीय नेताहरू भने योजनाहरू निर्धारित समयमै सकिने दाबी गर्छन् । योजना समयमै सम्पन्न नभए योजना मात्र अलपत्र नभई मुख्यमन्त्री पनि अलपत्र पर्ने नेकपा (एमाले) मोहन्याल गाउँ कमिटी अध्यक्ष बलबहादुर रावल बताउँछन् ।
  ‘योजना समयमा सम्पन्न हुने कुरामा हाम्रो विश्वास छ र समयमै सम्पन्न पनि हुनुपर्छ । योजना अलपत्र पर्नु भनेको मुख्यमन्त्री आफ्नै निर्वाचन क्षेत्रमा अलपत्र पर्नु हो,’ अध्यक्ष रावलले भने ।
  नेपाली कांग्रेस मोहन्याल गाउँपालिकाका सभापति कमल सावदले सडक निर्माणको काम समयमा सम्पन्न हुने तर पुल निर्माणमा फरक किसिमका जनशक्ति चाहिने भएकाले केही दुविधा मात्र रहेको बताउँछन् ।
 त्यस्तै नेपाली कम्युनिष्ट पार्टीका देविदत्त उपाध्याय पनि निर्माण कम्पनीले गरिरहेको काम हेर्दा योजनाहरू समयमै निर्माण सम्पन्न हुने विश्वास व्यक्त गर्छन् ।
कुन योजनाको लागत कति, कहिले सम्पन्न गर्नुपर्ने ? 
१) लम्की खानेपानीदेखि राजकाँडासम्म सडक कालोपत्रे(२.६ किमी) : ४ करोड ५६ लाख ९३ हजार ४४० रुपैयाँ ६० पैसा । सम्पन्न गर्नुपर्ने मितिः २०८३/०९/२५ ।
२) लम्कीचुहा रिङ्गरोड(२.७ किमी) : ४ करोड ३९ लाख ६४ हजार ५३० रुपैयाँ ४४ पैसा । सम्पन्न गर्नुपर्ने मितिः २०८३/०३/०५ ।
३) केशर मार्ग(२.७ किमी): ८ करोड २६ लाख ६२ हजार ३४ रुपैयाँ ३२ पैसा । सम्पन्न गर्नु पर्ने मितिः २०८३/०९/२५ । 
४) चिसापानी सोल्टा सडक स्तरोन्नती(२.४ किमी) : ६ करोड ६ लाख ९९ हजार ८९५ रुपैयाँ ४८ पैसा । सम्पन्न गर्नुपर्ने मितिः २०८३/०५/१६ । 
५) डुडेझारी टीकापुर सडक स्तरोन्नती(३.५ किमी): ६ करोड ९ लाख २० हजार ८७७ रुपैयाँ ३५ पैसा । सम्पन्न गर्नु पर्ने मितिः २०८३/०९/२४ ।
६) साघुरे खोला पुल(५० मिटर): ११ करोड २१ लाख ६७ हजार ८६८ रुपैयाँ १३ पैसा । सम्पन्न गर्नुपर्ने मितिः २०८४/०३/१६
६) बादे खोला पुल(१०० मिटर): १२ करोड ६० लाख ८० हजार ३१ रुपैयाँ १३ पैसा । सम्पन्न गर्नुपर्ने मितिः २०८४/०३/१६