प्रशासक | २०८२ पौस १२ गते ०९:२१ मा प्रकाशित

अक्षर साथी
लम्की, पुस १२
कैलालीको लम्कीचुहा सहित सुदूरपश्चिम प्रदेशका विभिन्न जिल्लामा एकै दिन भएका छुट्टाछुट्टै सवारी दुर्घटनामा ४ जनाको मृत्यु भएको छ भने केही घाइते भएका छन् ।
  कैलालीको लम्कीचुहा नगरपालिका–३ बल्चौरस्थित कैलाशधाम तीर्थस्थल नजिक पूर्व–पश्चिम राजमार्गमा बिहीवार बिहान करिब ७ः३० बजे मोटरसाइकल दुर्घटना हुँदा एक जनाको मृत्यु भएको छ। पूर्वबाट पश्चिमतर्फ जाँदै गरेको से ४ प ६७६० नम्बरको मोटरसाइकल अनियन्त्रित भई सडकको दाहिने किनारामा रहेको पिल्लरमा ठोक्किँदा चालक लम्कीचुहा–१ का २६ वर्षका अनिष भण्डारी गम्भीर घाइते भएका थिए । उनको उपचारका क्रममा टीकापुर अस्पतालमा मृत्यु भएको प्रहरीले जनाएको छ । मोटरसाइकलमा पछाडि सवार १५ वर्षीय तुफान भण्डारी सामान्य घाइते भएका छन् । 

ADVERTISE............................................................................................................................................................................
सोही दिन कैलालीको बर्दगोरिया गाउँपालिका–१ र ४ को सिमानामा रहेको काँडा पुलमा साँझ करिब साढे आठ बजे भएको मोटरसाइकल दुर्घटनामा घोडाघोडी नगरपालिका–११ का अन्दाजी २४ वर्षीय विशाल कठरियाको मृत्यु भएको छ । से ७ प ८१६५ नम्बरको मोटरसाइकल अनियन्त्रित भई पुलको किनारमा ठोक्किँदा चालक कठरिया र पछाडि सवार २४ वर्षीया रिता कठरिया घाइते भएकी थिइन् । विशाल कठरियाको उपचारका क्रममा नवजीवन अस्पतालमा मृत्यु भएको प्रहरीले जनाएको छ ।
  त्यस्तै कञ्चनपुरको शुक्लाफाँटा नगरपालिका–५ बनसमिति क्षेत्रमा साँझ पौने आठ बजे ट्र्याक्टर र मोटरसाइकल ठोक्किँदा एक जनाको मृत्यु भएको छ । महेन्द्रनगरबाट झलारीतर्फ आउँदै गरेको म १ त ९३१ नम्बरको ट्र्याक्टर र विपरीत दिशाबाट आउँदै गरेको सु.प.प्र.०२–००४ प २६८८ नम्बरको मोटरसाइकल ठोक्किँदा मोटरसाइकल चालक शुक्लाफाँटा–५ खजुवाका ४५ वर्षीय गुड्डु विक र पछाडि सवार ४० वर्षीय बिरराम पोखरेल घाइते भएका थिए । गुड्डु विकको उपचारका क्रममा महाकाली प्रादेशिक अस्पताल महेन्द्रनगरमा मृत्यु भएको हो । ट्र्याक्टर र चालक प्रहरीको नियन्त्रणमा छन् ।
  त्यस्तै डडेल्धुराको आलिताल गाउँपालिका–४ जालिटुडामा साँझ साढे आठ बजे जिप र अटो ठोक्किँदा एक जनाको मृत्यु भएको छ । बुडर–जोगबुढा सडक खण्डमा जोगबुढाबाट बुडरतर्फ जाँदै गरेको म १ च ४४१ नम्बरको जिप र विपरीत दिशाबाट आउँदै गरेको भि.न.पा. ००१ ह ४०८ नम्बरको अटो एकआपसमा ठोक्किँदा अटोमा सवार परशुराम नगरपालिका–१० का २६ वर्षीय रामबहादुर बराल मगर र अछाम पञ्चदेवल नगरपालिका–३ की २१ वर्षीया सबिता थापा मगर घाइते भएका थिए । रामबहादुर बराल मगरको उपचारका क्रममा जोगबुढा अस्पतालमा मृत्यु भएको प्रहरीले जनाएको छ । जिप चालक प्रहरी नियन्त्रणमा छन् भने अटो चालक फरार रहेका छन् । 
   प्रहरीले घटना बारे  थप अनुसन्धान भइरहेको बताएको छ ।