अक्षर साथी | २०८२ भाद्र २ गते १४:४४ मा प्रकाशित

अक्षर साथी
लम्की/भदौ, २
कैलालीको लम्कीचुहा नगरपालिकाले भूमिहीन र सुकुम्बासीका लागि अन्तिम ३५ दिने सूचना प्रकाशन गरेको छ । साउन ३० गते एक सूचना प्रकाशन गर्दै लम्कीचुहाका भूमिहीन दलित, भूमिहीन सुकुम्बासी र अव्यवस्थित बसोबासीलाई जग्गा उपलब्ध गराउनका लागि तोकिएको ढाँचामा निवदेन दिन नगरपालिकाले आग्रह गरेको छ । 
  ‘भूमि समस्या समाधान आयोगले भूमिहीन दलित तथा भूमिहीन सुकुम्बासीलाई जग्गा उपलब्ध गराउने र अव्यवस्थित बसोबासीको व्यवस्थापन गर्ने प्रयोजनका लागि कार्य सहमतिपत्र अनुसार लम्कीचुहा नगरपालिका वडा नं. १ देखि १० सम्मका भूमिहीन दलित, भूमिहीन सुकुम्बासी र अव्यवस्थित बसोबासीले जग्गा प्राप्त गर्न आयोगले तोकेको ढाँचा बमोजिम निवेदन फाराम सहित तपशीलका कागजातहरु संलग्न गरी मिति २०८२/०४/३० देखि ३५ दिनभित्र सम्बन्धित वडा कार्यालयहरुमा पेश गर्नु हुन यो सार्वजनिक सूचना प्रकाशन गरिएको छ,’ सूचनामा भनिएको छ । 
  त्यस्तै लम्कीचुहा नगरपालिकाका प्रमुख प्रशासकीय अधिकृत सुषमा महता के.सी.काअनुसार भूमिहीन र सुकुम्बासीका लागि मात्र नभएर यो सूचना नेपाल सरकारबाट ०७७ साल भन्दा अगाडिबाट गठन भएका आयोग, कार्यदल र समितिबाट वितरण गरेका जग्गाहरूको स्वामित्व वा दर्ता से्रस्ता वा नक्सा प्रमाणित लगायतका विषयमा कुनै समस्या भए सो समस्याको सामाधानको लागि आवश्यक प्रमाण कागजातसहित यही ३५ दिने अवधिमा निवेदन दिन सकिने छ । 
चाहिने कागजात के के हुन् ? कहाँ दिने निवेदन ? 
  भूमि शाखाका अधिकृत बिरेन्द्र बहादुर शाहीका अनुसार जग्गा धनि पूर्जाको प्राप्त गर्नको लागि लगत फारम भर्न छुटेकाहरूले नेपाली नागरिकताको प्रमाणपत्रको प्रतिलिपी,  निवेदक पति,पत्नीको पासपोर्ट साईजको फोटो १÷१ प्रति, चारकिल्ला सहितको भोगचलन सिफारिस, बिटौरी शुल्क /बिजुली/खानेपानीको शुल्क तिरेको रसिदको प्रतिलिपी, निवेदकले आफू भूमिहीन सुकुम्बासी/भूमिहीन दलित भनि गरेको स्वघोषणाको कागजात तथा निवेदकको अन्यत्र स्थानमा रहेको जग्गाको विवरण (जग्गाधनी प्रमाणपुर्जाको प्रतिलिपी, मालपोत कर तिरेको रसिदको प्रतिलिपी) सहित आफ्नो वडामा कार्यलयमा बुझाउन सकिने छ ।