प्रशासक | २०८२ भाद्र ८ गते १२:३१ मा प्रकाशित

अक्षर साथी
लम्की/ भदौ, ८
  कैलालीको लम्की स्थित लम्की लेडी जेसीजको विभिन्न सामाजिक कार्य गर्ने सप्ताहव्यापी कार्यक्रमको आज आइतवार अन्तिम दिन हो । यस दिनमा लम्की लेडी जेसीजले आफ्नो सप्ताहव्यापी कार्यक्रमको तालीका अनुसार रक्तदान कार्यक्रमको आयोजना गरेको छ । 
  लम्कीचुहा नगर प्रमुख सुशीला शाही, लेडी जेसीजकी अध्यक्ष जेसी बिरिन्दा सुवेदी धमाला, नेपाल रेडक्रस सोसाईटी कैलालीका उपकोषाध्यक्ष रंगप्रसाद तिमिल्सेना, बलिया उपशाखा सभापति बिनोद आर्चाय लगायत जेसीजका पूर्व पदाधिकारी र सदस्यहरू सहभागिता रहेको कार्यक्रमको व्यवस्थापन किसान बहुउद्देश्यीय सहकारी सँस्थाले गरेको थियो ।   

  नेपाल रेडक्रस सोसाईटी कैलालीको प्राविधिक सहयोगमा भएको रक्तदान कार्यक्रममा बोल्दै प्रमुख अतिथी लम्कीचुहा नगरपालिकाकी नगर प्रमुख सुशीला शाहीले जेसीज र नेपाल रेडक्रस सोसाइटीले रक्तदान कार्यक्रम मार्फत रक्त पाउनबाट बन्चित भएकाहरूलाई सहज बनाएको बताउँदै लम्कीमा जनताको सहजताको लागि ब्लड बैंकको स्थापना र एम्बुलेन्स थप्ने विषयमा छलफल भइरहेको  बताइन । 
  लम्की लेडी जेसीज सहित लम्कीका अन्य सामाजिक सँस्थाले राम्रो काम गरिरहेको बताउँदै नगर प्रमुख शाहीले लेडी जेसीजले यस्तै नयाँ नयाँ काम गर्नुपर्ने बताइन् । 
  जेसी पवित्रा विश्वकर्माको संयोजन र जेसी अन्जना शाहीको मूल संयोजनामा आयोजना गरिएको बृहत रक्तदान कार्यक्रम आइतवार साँझ ५ बजेसम्म सञ्चालन हुने अध्यक्ष जेसी बिरिन्दा सुवेदी धमालाले जानकारी दिइन ।